АЛМАТЫДА МҰХТАР ӘУЕЗОВ АТЫНДАҒЫ ТЕАТРДЫҢ 100-МАУСЫМЫ АШЫЛДЫ: ҰЛТТЫҚ ӨНЕРДІҢ ҒАСЫРЛЫҚ ЖЕҢІСІ
Фото: Видеодан алынған скрин
Алматыда қазақ мәдениетінің алтын бесігі саналатын Мұхтар Әуезов атындағы Қазақ ұлттық драма театры өзінің тарихи 100-маусымын салтанатты түрде ашты. Бұл — ғасырды артқа тастап, жаңа дәуірге нық қадам басқан ұлттық өнердің рухты мерейтойы.
Кеш «Ғасырға басқан қадам» атты театрландырылған қойылыммен басталып, көрермен қауым театр репертуарындағы ең таңдаулы спектакльдерден сахналық үзінділерді тамашалады. Әр қойылым — қазақ халқының өткені мен бүгінін, рухы мен болмысын паш еткен төл өнердің көркем көрінісі.
Залда арнайы әзірленген «Ғасыр жасаған ұлт театры» интерактивті көрмесі ұсынылып, қонақтар бір ғасырлық тарихы бар мәдени шежіремен жақынырақ танысу мүмкіндігіне ие болды.
Театрдың баспасөз қызметі Қазақ өнерінің тағдыры мен жауапкершілігін айшықтайтын жүрекжарды пікірін жеткізді:
«Бір ғасыр бойы театр сахнасынан көрермен жүрегіне жол тартқан әрбір спектакль – халықтың үні, заманның тынысы. Қазақ театрының ғасырлық шежіресі – елдің өткені мен бүгіні, ұлттық рух пен көркем ойдың тұтас әлемі. Бұл мұра алдағы ғасырларға жалғасып, ұлттың мәдени жадын байытып, рухани қазынасын тереңдете бермек».
Қазақтың тұңғыш кәсіби театрының шымылдығы 1926 жылдың 13 қаңтарында Қызылордада ашылды. Алғашқы қойылымдары Қошке Кемеңгерұлының «Алтын сақинасы» мен Мұхтар Әуезовтің «Еңлік – Кебек» пьесасынан үзінділер болды.
1928 жылы театр Алматыға көшіп, ұлттық өнерді жаңа деңгейге көтерген жас актерлер буынымен толықты. 1937 жылы 27 ақпанда театр академиялық мәртебе, ал 1961 жылы қазақ әдебиетінің алыбы Мұхтар Әуезовтің есімін иеленді.
2020 жылы Мемлекет басшысы Қасым-Жомарт Тоқаевтың Жарлығымен театрға Ұлттық театр мәртебесі беріліп, оның мәдени кеңістіктегі рөлі жаңа деңгейде айқындалды.
Қазір театр ғимаратына ауқымды жөндеу жұмыстары жүргізілуде. 2026 жылы аяқталатын бұл жаңғырту — ұлттық өнер ордасын жаңа ғасырдың техникалық және эстетикалық талаптарына сай қайта түлетудің маңызды қадамы.
