ГЕННАДИЙ ГОЛОВКИН І ДӘРЕЖЕЛІ «БАРЫС» ОРДЕНІМЕН МАРАПАТТАЛДЫ
Фото: QAZSPORTTV telegram
Қазақстан спортының әлемдік аренадағы символына айналған даңқты боксшы, бүгінде World Boxing халықаралық федерациясының президенті Геннадий Головкин ел Президенті Қасым-Жомарт Тоқаевтың қабылдауында болды.
Мемлекет басшысы аты аңызға айналған спортшымызды халықаралық федерацияға жетекшілікке сайлануымен құттықтап, бұл шешімнің оның жылдар бойы әлемдік боксқа қосқан зор үлесінің, мінсіз беделі мен кәсібилігінің халықаралық деңгейде мойындалғанының айқын дәлелі екенін атап өтті.
Мемлекет басшысы Қасым-Жомарт Тоқаев Геннадий Головкиннің ел спортына, Ұлттық олимпиада комитетіндегі қызметіне және Қазақстанның халықаралық беделін арттыруға сіңірген еңбегін жоғары бағалап, оны І дәрежелі «Барыс» орденімен марапаттады.
Бұл — тек бір спортшыға көрсетілген құрмет емес, бұл — қазақ спортының, ел рухының, ұлттық абыройдың салтанаты.
Головкин — әлем жұрты мойындаған талант. Оның рингіде ғана емес, өмірде де көрсеткен сабырлы мінезі, таза ойын қағидасы, жауапкершілігі бүкіл қазақ жастарына үлгі.
Президент қабылдауында GGG мемлекет тарапынан көрсетілген жоғары сенім мен қолдау үшін ризашылығын білдіріп, алдағы уақытта да:
боксты дамытуға,
ел намысын көтеруге,
Қазақстанның халықаралық спорт аренасындағы беделін арттыруға бар күшін жұмсайтынын айтты.
Геннадий Головкиннің марапатталуы — ел тарихына жазылатын маңызды оқиға.
