Қазақстандық жас шахматшылар Азия чемпионатында бес алтын медаль жеңіп алды
Фото: Kazchess
Таиланд астанасы Бангкокта өткен шахматтан 27-ші жасөспірімдер арасындағы Азия чемпионатында қазақстандық жас спортшылар тарихи жетістікке қол жеткізді. Жас шахматшыларымыз классика, рапид және блиц бағдарламалары бойынша жалпы 11 медаль, оның ішінде 5 алтын иеленіп, құрлық біріншілігінде үздік елдердің қатарынан табылды.
Бұл жеңіс — Қазақстандағы шахмат мектебінің абыройын асқақтатып, жас буынның әлемдік деңгейдегі әлеуетін тағы бір мәрте дәлелдеді.
Қазақстан құрамасының алтын жүлдегерлері:
Милана Филиппова (G10) — классика
Мария Холявко (G14) — классика
Әміржан Әнетов (O10) — рапид
Әлішер Әбдісаттар (O14) — блиц
Әсия Асылхан (G16) — блиц
Жас шахматшыларымыздың бұл жетістігі — еліміздің жасөспірімдер құрамасының дамудың жаңа кезеңіне көтерілгенінің белгісі.
2025 жылғы 21–29 қараша аралығында Бангкокта өткен чемпионатқа Азияның 33 елінен және аумақтарынан шамамен 700 қатысушы жиналды. Қатысушылар үш бағдарламада бақ сынады:
Рапид (15+5)
Классика (90+30)
Блиц (3+2)
Әр санаттағы тартысты партиялар жас шахматшылардың шыдамын, ойлау жүйесін және шеберлік деңгейін айқын көрсетті.
Рапид кезеңінде (15+5):
Азия чемпионы — Әміржан Әнетов (O10)
Қола медаль — Алихан Назарбек (O10)
Классикада (90+30):
Алтын: Милана Филиппова (G10), Мария Холявко (G14)
Қола: Ризат Ұлан (O10), Әдия Жеңіс (G12), Ясмина Алеманова (G16)
Блицте (3+2):
Алтын: Әлішер Әбдісаттар (O14), Әсия Асылхан (G16)
Күміс: Асман Баянтас (O18)
Қола: Әлімжан Жауынбай (O12)
Қазақстандық шахматшылар үш бағдарламада да жоғары нәтижелер көрсетті. Бірі өз әмбебаптығын дәлелдесе, енді бірі алдыңғы турлардағы қателерін түзетуге мүмкіндік алды. Нәтижесінде барлығы ел намысын абыроймен қорғады.
Айта кетейік, Мемлекет басшысы әлем біріншіліктерінде жеңіске жеткен жас қазақстандық шахматшылармен арнайы кездесіп, олардың табыстарын жоғары бағалаған еді. Президенттің осы қолдауы — бүгінгі жетістіктердің маңызды қозғаушы күші.
Қазақстандық жас таланттардың Бангкоктағы жеңісі — ел спортының дамуы жолындағы үлкен қадам. Бұл табыстар болашақ чемпиондардың қалыптасуына жол ашып, Қазақстанның шахматтан Азиядағы жетекші елдердің қатарына кіргенін тағы бір рет дәлелдеді.
