Әмір Омарханов Тунистегі турнирде қарсыласын ойсырата жеңіп, жартылай финалға жолдама алды
Фото: ҚТФ
Қазақстанның жас теннис жұлдызы, небәрі 18 жастағы Әмір Омарханов Тунисте өтіп жатқан M15 санатындағы халықаралық ITF турнирінде кезекті жарқын жеңіске қол жеткізіп, жартылай финалға өтті. Бұл — жас спортшының халықаралық аренадағы сенімді қадамы мен ел намысын абыроймен қорғап жүргенінің айқын дәлелі.
Ширек финалда Әмір әлемнің 890-ракеткасы, тәжірибелі үндістандық Чираг Духанмен кездесіп, ойын тізгінін толық өз қолында ұстай білді. Матч басынан бастап жоғары қарқын көрсеткен қазақ спортшысы қарсыласына еш мүмкіндік бермей, сенімді түрде 6:1, 6:2 есебімен ойсырата жеңді.
Әлемдік рейтингіде 1100-орында тұрған Әмір үшін бұл жеңіс — халықаралық рейтингте жоғары өрлеуге, ал кәсіби мансабында жаңа белеске апарар маңызды қадам. Енді ол финалға жолдама үшін осы жарыстың 1-ракеткасы, франциялық Томас Фурельге қарсы сынға түседі. Жартылай финал кездесуі 29 қараша күні өтеді деп жоспарланған.
Айта кетейік, Әмір Омарханов соңғы уақытта өте қарқынды өнер көрсетіп жүр. Жас спортшының жеңіс сериясы қазір 7 матчқа жетті. Бұл — оның бойындағы табандылық пен еңбекқорлықтың, сондай-ақ қазақ теннисінің өсіп келе жатқан әлеуетінің көрінісі
Сонымен қатар, қазақстандық теннисшілердің табысты өнері тек Туниспен шектелмейді. Денис Евсеев Пәкістанда өткен жарыста жартылай финалға жолдама алды, ал тәжірибелі спортшы Зарина Дияс Қытайдағы арнайы турнирдің финалына шықты.
Қазақстандық спортшылардың халықаралық додалардағы серпінді нәтижелері — ел спортының дамуының айқын дәлелі, ал жас таланттардың жеңістері болашақ чемпиондардың өсіп келе жатқанын көрсетеді.
Туымызды көкке желбіретіп жүрген спортшыларымызға сәттілік тілейміз!
